ਰਿਸ਼ੀ
ਯੂਕਰੇਨ ਨਾਲ ਚੱਲ ਰਹੀ ਜੰਗ ਕਾਰਨ ਰੂਸ ਅਤੇ ਅਮਰੀਕਾ ਵਿਚਾਲੇ ਤਣਾਅ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਦੋਵਾਂ ਦੇਸ਼ਾਂ ਵਿਚਾਲੇ ਚੱਲ ਰਹੇ ਤਣਾਅ ਦਰਮਿਆਨ ਅਮਰੀਕਾ ਦੇ ਅਲਾਸਕਾ ਨੇੜੇ ਅਜਿਹੀ ਘਟਨਾ ਵਾਪਰੀ, ਜਿਸ ਨੇ ਹਰ ਕੋਈ ਹੈਰਾਨ ਰਹਿ ਗਿਆ। ਰੂਸੀ ਲੜਾਕੂ ਜਹਾਜ਼ ਸੁਖੋਈ-35 ਅਲਾਸਕਾ ਨੇੜੇ ਸਮੁੰਦਰ ‘ਚ ਅਮਰੀਕੀ ਲੜਾਕੂ ਜਹਾਜ਼ ਐੱਫ-16 ਦੇ ਨੇੜੇ ਖਤਰਨਾਕ ਤਰੀਕੇ ਨਾਲ ਲੰਘਿਆ। ਇਸ ਦੌਰਾਨ ਦੋਵਾਂ ਦੇ ਟਕਰਾ ਜਾਣ ਦਾ ਖਤਰਾ ਬਣਿਆ ਹੋਇਆ ਸੀ। ਇਸ ਘਟਨਾ ਦੀ ਵੀਡੀਓ ਅਮਰੀਕੀ ਫੌਜ ਨੇ ਵੀ ਸ਼ੇਅਰ ਕੀਤੀ ਹੈ।
ਯੂਰੇਸ਼ੀਅਨਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਉੱਤਰੀ ਅਮਰੀਕੀ ਏਅਰੋਸਪੇਸ ਡਿਫੈਂਸ ਕਮਾਂਡ (NORAD) ਨੇ ਘਟਨਾ ਦੀ ਫੁਟੇਜ ਜਾਰੀ ਕੀਤੀ ਹੈ। ਇਹ ਘਟਨਾ ਅਲਾਸਕਾ ਏਅਰ ਡਿਫੈਂਸ ਆਈਡੈਂਟੀਫਿਕੇਸ਼ਨ ਜ਼ੋਨ (ADIZ) ਵਿੱਚ ਵਾਪਰੀ। NORAD ਉੱਤਰੀ ਅਮਰੀਕਾ ਦੇ ਆਲੇ-ਦੁਆਲੇ ਹਵਾਈ ਖੇਤਰ ਦੀ ਨਿਗਰਾਨੀ ਕਰਨ ਲਈ ਜ਼ਿੰਮੇਵਾਰ ਹੈ।
ਲੜਾਕੂ ਜਹਾਜ਼ ਬਫਰ ਜ਼ੋਨ ਵਿੱਚ ਟੱਕਰ ਹੋਣ ਤੋਂ ਬਚਿਆ
ਅਲਾਸਕਾ ਏਅਰ ਡਿਫੈਂਸ ਆਈਡੈਂਟੀਫਿਕੇਸ਼ਨ ਜ਼ੋਨ ਇੱਕ ਬਫਰ ਜ਼ੋਨ ਹੈ ਜਿੱਥੇ ਅਮਰੀਕੀ ਲੜਾਕੂ ਜਹਾਜ਼ ਲਗਾਤਾਰ ਨਿਗਰਾਨੀ ਕਰਦੇ ਹਨ। ਇੱਥੇ ਵਿਦੇਸ਼ੀ ਜਹਾਜ਼ਾਂ ਨੂੰ ਆਪਣੀ ਪਛਾਣ ਲਈ ਲੋੜ ਹੁੰਦੀ ਹੈ। ਰੂਸੀ ਅਤੇ ਅਮਰੀਕੀ ਜਹਾਜ਼ ਅਕਸਰ ਇੱਥੇ ਇੱਕ ਦੂਜੇ ਦਾ ਸਾਹਮਣਾ ਕਰਦੇ ਹਨ। ਹਾਲਾਂਕਿ, ਇਹ ਪਹਿਲੀ ਵਾਰ ਸੀ ਜਦੋਂ ਕੋਈ ਰੂਸੀ ਜਹਾਜ਼ ਕਿਸੇ ਅਮਰੀਕੀ ਲੜਾਕੂ ਜਹਾਜ਼ ਦੇ ਇੰਨੇ ਨੇੜਿਓਂ ਲੰਘਿਆ।
NORAD ਦੇ ਦੋ F-16 ਲੜਾਕੂ ਜਹਾਜ਼ ਸਰਹੱਦ ਦੀ ਨਿਗਰਾਨੀ ਕਰ ਰਹੇ ਸਨ। ਫਿਰ ਅਚਾਨਕ ਰੂਸੀ ਲੜਾਕੂ ਜਹਾਜ਼ ਸੁਖੋਈ-35 ਇਨ੍ਹਾਂ ਦੋਵਾਂ ਜਹਾਜ਼ਾਂ ਦੇ ਵਿਚਕਾਰੋਂ ਲੰਘ ਗਿਆ। ਇਸ ਘਟਨਾ ਦੀ ਵੀਡੀਓ ਅਮਰੀਕੀ ਜਹਾਜ਼ਾਂ ਨੇ ਕੈਮਰੇ ‘ਚ ਕੈਦ ਕਰ ਲਈ ਹੈ। ਹਾਲਾਂਕਿ ਇਹ ਘਟਨਾ ਅੰਤਰਰਾਸ਼ਟਰੀ ਸਰਹੱਦ ‘ਤੇ ਵਾਪਰੀ ਹੈ।
ਘਟਨਾ ਕਿਵੇਂ ਵਾਪਰੀ?
ਅਮਰੀਕਾ ਨੇ ਦੱਸਿਆ ਕਿ ਐੱਫ-16 ਜਹਾਜ਼ ਰੂਸੀ ਟੀਯੂ-95 ਬੰਬਾਰ ਜਹਾਜ਼ਾਂ ਦਾ ਪਿੱਛਾ ਕਰ ਰਹੇ ਸਨ। ਫਿਰ ਅਚਾਨਕ ਸੁਖੋਈ-35 ਦੋ ਐੱਫ-16 ਜੈੱਟ ਜਹਾਜ਼ਾਂ ਵਿਚਕਾਰੋਂ ਲੰਘ ਗਿਆ। ਇਹ ਘਟਨਾ 23 ਸਤੰਬਰ ਦੀ ਦੱਸੀ ਜਾ ਰਹੀ ਹੈ।
ਦਰਅਸਲ, ਯੂਕਰੇਨ ਨਾਲ ਜੰਗ ਦੇ ਵਿਚਕਾਰ, ਰੂਸੀ ਹਵਾਈ ਸੈਨਾ ਅਤੇ ਜੰਗੀ ਬੇੜੇ ਅਲਾਸਕਾ ਦੇ ਆਲੇ-ਦੁਆਲੇ ਘੁੰਮਣ ਲੱਗੇ ਹਨ। ਦੂਜੇ ਪਾਸੇ ਅਮਰੀਕਾ ਨੇ ਰੂਸ ਦੀਆਂ ਗਤੀਵਿਧੀਆਂ ਨੂੰ ਦੇਖਦੇ ਹੋਏ ਚੌਕਸੀ ਵਧਾ ਦਿੱਤੀ ਹੈ। ਦ ਵਾਰ ਜ਼ੋਨ ਦੀ ਰਿਪੋਰਟ ਮੁਤਾਬਕ ਅਮਰੀਕਾ ਨੇ ਰੂਸ ਦੀਆਂ ਗਤੀਵਿਧੀਆਂ ‘ਤੇ ਨਜ਼ਰ ਰੱਖਣ ਲਈ ਰੱਖਿਆ ਨੈੱਟਵਰਕ ਤਿਆਰ ਕੀਤਾ ਹੈ। ਇਸ ਵਿੱਚ ਸੈਟੇਲਾਈਟ, ਰਾਡਾਰ ਅਤੇ ਲੜਾਕੂ ਜਹਾਜ਼ ਸ਼ਾਮਲ ਕੀਤੇ ਗਏ ਹਨ।
