ਰਿਸ਼ੀ
ਲੇਬਨਾਨ ਪੇਜਰ ਬਲਾਸਟ ਤਾਜ਼ਾ ਖ਼ਬਰਾਂ: ਮੰਗਲਵਾਰ ਨੂੰ ਲੇਬਨਾਨ ਅਤੇ ਸੀਰੀਆ ਦੇ ਕੁਝ ਖੇਤਰਾਂ ਵਿੱਚ ਲੜੀਵਾਰ ਪੇਜਰ ਧਮਾਕਿਆਂ ਕਾਰਨ ਕਈ ਲੋਕਾਂ ਦੀ ਮੌਤ ਹੋ ਗਈ ਅਤੇ ਹਜ਼ਾਰਾਂ ਲੋਕ ਜ਼ਖਮੀ ਹੋ ਗਏ। ਇਸ ਧਮਾਕੇ ਤੋਂ ਬਾਅਦ ਹਿਜ਼ਬੁੱਲਾ ਨੇ ਇਸ ਲਈ ਇਜ਼ਰਾਈਲ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਹਾਲਾਂਕਿ ਇਜ਼ਰਾਈਲ ਨੇ ਅਜੇ ਤੱਕ ਇਸ ‘ਤੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿੱਤੀ ਹੈ।
ਦੂਜੇ ਪਾਸੇ ਹੁਣ ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਸਰਾਈਲ ਦੀ ਖੁਫੀਆ ਏਜੰਸੀ ਮੋਸਾਦ ਨੇ ਇਸ ਧਮਾਕੇ ਦੀ ਸਕ੍ਰਿਪਟ ਕਰੀਬ ਪੰਜ ਮਹੀਨੇ ਪਹਿਲਾਂ ਲਿਖੀ ਸੀ। ਉਸ ਨੇ ਪੰਜ ਮਹੀਨੇ ਪਹਿਲਾਂ ਪੇਜ਼ਰ ਵਿੱਚ ਵਿਸਫੋਟਕ ਫਿੱਟ ਕੀਤਾ ਸੀ। ਇਸ ਜਾਣਕਾਰੀ ਤੋਂ ਬਾਅਦ ਹੁਣ ਤਾਈਵਾਨੀ ਕੰਪਨੀ ਵੀ ਸਵਾਲਾਂ ਦੇ ਘੇਰੇ ‘ਚ ਹੈ।
ਇਸ ਕਾਰਨ ਇਜ਼ਰਾਈਲ ‘ਤੇ ਸ਼ੱਕ ਹੋਰ ਡੂੰਘਾ ਹੋ ਗਿਆ
ਨਿਊਯਾਰਕ ਟਾਈਮਜ਼ ਦੀ ਰਿਪੋਰਟ ਮੁਤਾਬਕ ਇਜ਼ਰਾਈਲ ਨੇ ਹਿਜ਼ਬੁੱਲਾ ਵਿਰੁੱਧ ਮੋਸਾਦ ਦੀ ਖੁਫੀਆ ਕਾਰਵਾਈ ਦੇ ਹਿੱਸੇ ਵਜੋਂ ਇਨ੍ਹਾਂ ਪੇਜਰਾਂ ਵਿੱਚ ਵਿਸਫੋਟਕ ਫਿੱਟ ਕੀਤੇ ਸਨ। ਰਿਪੋਰਟ ‘ਚ ਦੱਸਿਆ ਗਿਆ ਹੈ ਕਿ ਕੁਝ ਸਮਾਂ ਪਹਿਲਾਂ ਹਿਜ਼ਬੁੱਲਾ ਨੇ ਗੋਲਡ ਅਪੋਲੋ ਨਾਂ ਦੀ ਤਾਈਵਾਨੀ ਕੰਪਨੀ ਨੂੰ ਕਰੀਬ ਤਿੰਨ ਹਜ਼ਾਰ ਪੇਜ਼ਰ ਦਾ ਆਰਡਰ ਦਿੱਤਾ ਸੀ। ਕੰਪਨੀ ਨੇ ਇਨ੍ਹਾਂ ਪੇਜਰਾਂ ਨੂੰ ਇਸ ਸਾਲ ਅਪ੍ਰੈਲ ਤੋਂ ਮਈ ਦਰਮਿਆਨ ਤਾਈਵਾਨ ਤੋਂ ਲੈਬਨਾਨ ਭੇਜਿਆ ਸੀ ਪਰ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਲੇਬਨਾਨ ਪਹੁੰਚਣ ਤੋਂ ਪਹਿਲਾਂ ਹੀ ਇਨ੍ਹਾਂ ਨਾਲ ਛੇੜਛਾੜ ਕੀਤੀ ਗਈ ਸੀ ਅਤੇ ਇਨ੍ਹਾਂ ‘ਚ ਵਿਸਫੋਟਕ ਫਿੱਟ ਕੀਤੇ ਗਏ ਸਨ। ਕਿਉਂਕਿ ਇਨ੍ਹਾਂ ਪੇਜਰਾਂ ਦੀ ਡਿਲੀਵਰੀ ਦਾ ਸਮਾਂ ਅਪ੍ਰੈਲ ਤੋਂ ਮਈ ਵਿਚਕਾਰ ਹੈ ਅਤੇ ਇਸ ਦੌਰਾਨ ਇਜ਼ਰਾਈਲ ਅਤੇ ਹਿਜ਼ਬੁੱਲਾ ਵਿਚਾਲੇ ਤਣਾਅ ਸ਼ੁਰੂ ਹੋ ਗਿਆ ਸੀ, ਇਸ ਲਈ ਸ਼ੱਕ ਇਜ਼ਰਾਈਲ ‘ਤੇ ਹੀ ਪੈ ਰਿਹਾ ਹੈ।
ਬੈਟਰੀ ਦੇ ਕੋਲ 1-2 ਔਂਸ ਵਿਸਫੋਟਕ
ਅਮਰੀਕੀ ਅਧਿਕਾਰੀਆਂ ਮੁਤਾਬਕ, ਪੇਜ਼ਰ ਦਾ ਮਾਡਲ ਨੰਬਰ AP924 ਸੀ ਅਤੇ ਹਰੇਕ ਪੇਜ਼ਰ ਦੀ ਬੈਟਰੀ ਦੇ ਕੋਲ ਇੱਕ ਤੋਂ ਦੋ ਔਂਸ ਵਿਸਫੋਟਕ ਸੀ। ਸੂਤਰਾਂ ਦਾ ਕਹਿਣਾ ਹੈ ਕਿ ਲੇਬਨਾਨ ‘ਚ ਦੁਪਹਿਰ 3:30 ਵਜੇ ਇਨ੍ਹਾਂ ਪੇਜਰਾਂ ‘ਤੇ ਇਕ ਮੈਸੇਜ ਆਇਆ ਅਤੇ ਇਸ ਤੋਂ ਬਾਅਦ ਪੇਜਰ ‘ਚ ਲਗਾਇਆ ਗਿਆ ਵਿਸਫੋਟਕ ਐਕਟੀਵੇਟ ਹੋ ਗਿਆ। ਦੱਸਿਆ ਗਿਆ ਹੈ ਕਿ ਧਮਾਕੇ ਤੋਂ ਪਹਿਲਾਂ ਕਈ ਸਕਿੰਟਾਂ ਤੱਕ ਇਨ੍ਹਾਂ ਪੇਜਰਾਂ ‘ਚ ਬੀਪ ਦੀ ਆਵਾਜ਼ ਸੁਣਾਈ ਦਿੱਤੀ।
PETN ਵਿਸਫੋਟਕ ਵਰਤਣ ਦਾ ਦਾਅਵਾ
ਸਕਾਈ ਨਿਊਜ਼ ਅਰੇਬੀਆ ਦੀ ਰਿਪੋਰਟ ਮੁਤਾਬਕ ਮੋਸਾਦ ਨੇ ਹਿਜ਼ਬੁੱਲਾ ਦੇ ਪੇਜ਼ਰ ਦੇ ਅੰਦਰ PETN ਫਿੱਟ ਕੀਤਾ ਸੀ। ਇਹ ਅਸਲ ਵਿੱਚ ਇੱਕ ਕਿਸਮ ਦਾ ਵਿਸਫੋਟਕ ਹੈ, ਜੋ ਪੇਜਰ ਬੈਟਰੀਆਂ ਵਿੱਚ ਵਰਤਿਆ ਜਾਂਦਾ ਸੀ। ਇਹ ਪੇਜਰ ਬੈਟਰੀ ਦਾ ਤਾਪਮਾਨ ਵਧਾ ਕੇ ਧਮਾਕੇ ਕੀਤੇ ਗਏ। ਇਸ ਵਿਸਫੋਟਕ ਦਾ ਭਾਰ 20 ਗ੍ਰਾਮ ਤੋਂ ਘੱਟ ਸੀ।
1996 ਵਿੱਚ ਫੋਨ ਦੇ ਅੰਦਰ ਆਰਡੀਐਕਸ ਲਗਾਇਆ ਗਿਆ ਸੀ
ਇਜ਼ਰਾਈਲ ਵੱਲੋਂ ਇਸ ਤਰ੍ਹਾਂ ਦੇ ਹਮਲੇ ਦਾ ਇਹ ਪਹਿਲਾ ਮਾਮਲਾ ਨਹੀਂ ਹੈ। ਇਸ ਤੋਂ ਪਹਿਲਾਂ ਵੀ ਕੁਝ ਅਜਿਹੇ ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਅਮਰੀਕਾ ਦੇ ਸਾਬਕਾ ਰਾਸ਼ਟਰੀ ਸੁਰੱਖਿਆ ਖੁਫੀਆ ਵਿਸ਼ਲੇਸ਼ਕ ਡੇਵਿਡ ਕੈਨੇਡੀ ਦੇ ਅਨੁਸਾਰ, ਇਜ਼ਰਾਈਲ ਨੇ 1996 ਵਿੱਚ ਹਮਾਸ ਦੇ ਨੇਤਾ ਯਾਹਿਆ ਅਯਾਸ਼ ਦੀ ਹੱਤਿਆ ਲਈ ਉਸ ਦੇ ਫੋਨ ਵਿੱਚ 15 ਗ੍ਰਾਮ ਆਰਡੀਐਕਸ ਵਿਸਫੋਟਕ ਲਗਾਇਆ ਸੀ।
ਇਹ ਵੀ ਪੜ੍ਹੋ
